Wednesday, February 20, 2013

පින් පුරවන මව්වරුනේ පින් පුරවන පියවරුනේ






පින් පුරවන මව්වරුනේ  පින් පුරවන පියවරුනේ
සසුනඹරේ දිලෙනා තරු දන් දී පින් පුරවන මව්වරුනේ
කහවත දරලා දරුවන් යන සැටි බලා හිදී  පිය වරුනේ
ගිහි ගෙය හැරදා උන් යන මොහොතේ කඳුළු වරන මව්වරුනේ




දරුවන් ගේ දුක් කඳුළු පිසින්නට පියවරු හිටියා නෙතුපිය අතරේ
 දරුවන්  ඉපදී මියයන මොහොතේ   දුක ඉවසා  මහමෙර සේ
පියවරු හිටියා     දුක් ඉවසා  මව්වරු හිටියා අනන්ත  සසරේ
මව්වරු සිටියා  පියවරු සිටියා  දුක දරාන ඉපිද ඉපිද යන මේ  සසරේ  





දරුවන් සඳහා කරුණා මෙත පා කඳුලැළි පිසිනා  මව්වරුනේ
දහදිය වගුරා සැම සැප සදලා සෙනෙහස වපුරන පියවරුනේ
මව්වරු පියවරු සසර පුරා දරු දුක ඉවසා නොසැලී  හිඳිමි නේ
බෝසත් ගුණ වපුරා පින් පුරවන මව්වරුනේ 
පින් පුරවන පියවරුනේ

26 comments:

කෝරලේ මහත්තයා said...

මව් පිය ගුනට සමකල හැකි අන්කිසිවක් නැත මෙලොවේ...

නමුත් කරුමෙකට වගේ බොහෝ දෙනෙක්ට අමතක වෙන කාරණයක් තමයි මේක
කෝරලේ වලව්ව

Chandana said...

දුක සැප දෙකේදීම වෙනසක් නැතුව ළඟ ඉන්නේ දෙමව්පියෝ නේ. දැන් නම් මේ තත්ත්වය ටිකෙන් ටික වෙනස් වෙමින් යනවා ද කියලත් මට හිතෙනවා. දරු, දෙමාපිය දෙපාර්ශවයෙන් ම.

♥ ළිහිණි ♥ said...

මව් පියනට වඩා දෙයක් මේ ලෝකේ නෑ කියලමයි මට හිතෙන්නෙ. අවාසනාවට මට කතා කරන්න ඉතිරි වෙන්නෙ මව් ගැන විතරයි... පද ටික අපූරුයි චාන්දි අක්කා..

රූ.... said...

අපූරු පද පෙලක්..තනුවක් දාන්න උත්සාහ කලේ නැද්ද?

දයානන්ද රත්නායක said...

අර උඩම තියෙන සිතුවම හරිම ලස්සනයි..

මේ පද ටික ගීයක් වගේ.. කියවන විට හිතුනේ රඹුකන සිද්ධාර්ථ හිමියන්ලිව්වා වගේ හැඟීමක්.

sAm (සෑම්) said...

සංවේදී !

ජය වේවා !

නන්ඳු said...

මව් පියන්ගෙ ගුණ සුවඳ සසරෙන් සසර ලියැවෙන අරුත් සංවේදී සිතිවිලි එලිදැක්මක්..!

Chandi said...

@ කෝරලේ වලව්ව;
ඒ සෙනෙහසට සමකරන්න කිසිම දෙයක් මේ ලෝකෙ නෑ. මේ කවිපන්තිය ලියවුනේ සසුනට තම දරුවන් දන් දීල ඒ දුක උහුලා ඉන්නා මව්පියන් වෙනුවෙන් හා තමන් ජීවත්ව ඉන්නැත්දි තම දරුවන් මියයනවා දැක ඒ දුක් උහුලා ඉන්නා මව් පියන් වෙනුවෙන්.

Chandi said...

@ චන්දන ;
ඇත්ත මල්ලි, කාලෙ දැන් වෙනස් වෙලා. ඒ උනාට අපි අපිට පුළුවන් ලෙස ලෝකය ලස්සන කරන්න උත්සාහ කරමු. එක් එක් කෙනා හැඳුනහම ලෝකෙ ඉබේම හැදේවි. ඔබ පිය පදවිය ලැබුව දිනෙක ඔබ ඒ දරුවන් හොඳින් හැදුවොත් ඒ අය ලෝකෙ ලස්සන කරාවි. අපේ දෙමාපියන් අපිව හොඳට හදාගත්ත නිසානෙ අපි මේ දේ දකින්නෙ. ඔයාල හොඳ හදවත් ඇති දරුවන්. ඒ දේ දිගටම තියාගන්න . ඒක තමයි අපිට තියෙන සතුට.

Chandi said...

@ ලිහිණි;
ස්තූතියි! ඔයාගෙ තාත්තා ඔයා දිහා බලා ඉන්න බව විශ්වාස කරන්න. ඒක ජීවිතේට ශක්තියක් වෙයි. අපිට හැම දේම සාදාකල් තියාගන්න බෑ. එහෙම තමයි, කෙනෙක්ට දරුවො නැතිවෙනවා, දෙමාපියන් නැතිවෙනවා, සහෝදර සහෝදරියන් නැතිවෙනවා, එහෙම තමයි. ඒවා තුලින් ජීවිතේ දකින්න. ජීවිතේ විඳින්න.

Chandi said...

@ රූ......;
ස්තූතියි රූ. එහෙම කල්පනාවක් ආවේ නෑ.

Chandi said...

@ දයා මල්ලි;
අනේ, ඒ තරම්ම මම හිතන්නේ නෑ හොඳයි කියල. මේක ලියැවුනේ සසර දුක උහුලා ඉන්නා දෙමාපියන් ගැන හිතලයි. මගෙ බාප්පාගෙ පුතා ගිහි ගේ හැර ගියා. ඒ දුක උහුලා ඒ අය හිටියා. මගේ අම්මයි , තාත්තයි මගේ නංගී මිය යත්දි ඒ දුක උහුලා හිටියා. මේ සසර දුක දෙමාපියන් ඉපදෙන හැම ආත්මෙකම විඳින්න ඇතිනේද කියා හිතුන සිතුවිල්ල තමා මේ.

Chandi said...

@ sAm;
ස්තූතියි,සෑම්.

Chandi said...

@ නන්ඳු;
බොහොම ස්තූතියි! නන්ඳු.

මැණික් said...

මව්පිය ගුන නිම නොවේමැයි. හොඳ නිර්මානයක්
මැණික්

උමා(දසුන්) said...

මාර විදිහට හිත නිවෙනවා මේක කියවද්දී...බලද්දී...සතුටුයි මාර විදිහට....

වර්ෂා ( Rain_Girl ) said...

අම්මා තාත්තා තරම් වටින දෙන්නෙක් ලෝකෙ කොහේවත් නෑ නැන්දි.ඉන්නවා නම් ඒ මගෙ ආච්චිඅම්මත්,පුංචිඅම්මත් විතරයි.අපි බාහිර අයට කොයි තරම් ආදරය කළත් අම්මා තාත්තා වගේ ලෝකෙ වෙන කවුරුවත් අපිට ආදරය කරන්නෙ නෑ.ලස්සන පදපෙළක් නැන්දි.

Chandi said...

@ මැණික්;
ස්තූතියි මැණික්. මව් පිය ගුණ කියා නිම කරන්නට නම් බැහැ තමයි නංගි.

Chandi said...

@උමා(දසුන්) ;
හිත නිවෙනා බව දැන ගත්තාම සතුටුයි උමා.

Chandi said...

@ වර්ෂා ( Rain_Girl );
බොහොම ස්තූතියි දුවේ. ඒක ඇත්ත, ඔයාට වාගේම මගෙත් පුංචි අම්මලා හා ආච්චි අම්මා ගොඩාක් මට ආදරය සෙනෙහස දුන්නා. ඒ නිසාම තමා මා අද මේ තත්වේ ඉන්නෙ. ඒ හැමටම පිං.

Chinthaka Supun said...

හරිම ලස්සන පද වැලක්.... කියවද්දී එන්නේ අමුතුම හැඟීමක්...!

Chandi said...

බොහොම ස්තූතියි! සුපුන්.

ගංඟාවේ ගීතය said...

ඇයි මේ හුඟක් දවසකින් දකින්න නැත්තෙ නැන්දව?

Chandi said...

@ ගංඟාවේ ගීතය;
අසනීපෙන් හිටිය දුව. තාම බෙහෙත් කරනවා. බොහොම ස්තූතියි සොයා බැලුවට.

ගංඟාවේ ගීතය said...

'සිත නිවන පියුම් විල'ට ගොඩ උනාම කාලෙකින් නොදකින්න හේතුව දැක්කා.නැන්දාට ඉක්මන් සුවය සහ සිතේ සැනසීම මුලු හිතින්ම ප්‍රාර්තනා කරනවා. බිය වියයුතු නෑ. ධර්මයෙහි හැසිරෙන්නා ධර්මය විසින් රකිනු ලැබෙනවනෙ.

නැන්දාට තෙරුවන්ගේ පිහිටත් ආරක්ෂාවත් නොඅඩුවම තියෙනබව විශ්වාසයි.

නිල් මානෙල් said...

අනුන්ගේ දුකට සංවේදී වෙනවා කියන්නේ ඒ පුද්ගලයා හරි කරුනාවන්ත හිතක් තියෙන කෙනෙක් කියන එකයි. හැමෝම එහෙම නැ. පාරෙ කෙනෙක් මැරිල හිටියත් වාහනේ නවත්වන්නෙ නැතුව යන අවස්ත අපි ඕඑන තරම් අහල තියෙනවා. කවි ටික ගීතයක් වගෙයි.

Post a Comment